BETONG, 9 Sept: Dua staf perubat Sepital Betong raya bakal pengudah ambulans ke ditepan seduai iya pagi tadi kena penusah aksiden ke ngaul sebuah treler ba Jalai Pan Borneo enda jauh ari menua Memaloi Betong.
Tuai Balai Bomba enggau Penyah Penusah (BBP) Betong Penolong Penguasa Bomba Vincent Baling Yabi madah, penusah nyadi urung pukul 4.24 minit pagi.
Ambulans ke bebadi nya dibai siku deriba ke beumur 45 taun enda memukai ngelantak belakang sebuah treler ke ngetu ba tisi jalai.
“Bisi dua iku tudah raya bakal iya nya staf KKM, siku lelaki besai tuai ke deriba enggau siku indu misi.
“Seduai udah mujur dipansutka orang periman sebedau penatai raban Bomba enggau misi tadi udah dibai ambulans KKM ke Sepital Betong, udah nya deriba ambulans dibai raban KKM ke Sepital Sri Aman ngambika diperubat silik.
“Raban boma udah meresi palan peusah nyadi dikena nentuka nadai pekara ngeruga pengelikun.
“Pengudah nentuka palan nya likun raban (bomba) bekejang pulai. Maya penusah nyadi gaya hari bisi ujan enggau jalai petang tegayam,” ku iya.
Iya madah munyi nya maya dirandau TVS pengudah Operasyen Ngesah tudah ke aksiden di Jalai Pan Borneo enda jauh ari menua Memaloi, Skrang Betong.
Ku iya, penguna jalai raya lebih raban ke deriba entukar berat patut seruran nentuka diri ngetu ba endur ke likun dikena nyeliahka penusah enda disadang baka aksiden.
Dulu ari nya, bisi lapan kaban ari Balai Bomba enggau Penyah Penusah Betong berumban ngesah palan peusah nyadi pengudah nerima kangau ngenyit pukul 4.24 minit pagi.
Dua iku tudah ke baka iya nya deriba ambulans Tan Tze Yen, 45 asal ari Saratok enggau siku misi iya nya Lizawati Mohamad.-TVS
