KUCHING, 4 April : Polis di Sarawak ngerikodka 332 kes aksiden ba jalai raya nyengkaum lima bebadi nyawa, sekumbang Op Selamat 24 nyerumba pengerami Hari Raya Aidilfitri.
Kepala Polis Sarawak Datuk Mancha Ata madah, kes aksiden ba jalai raya enggau pemati bela nunjukka penurun 6.2 peratus enggau 28.6 peratus dibanding Op Selamat 22 ke dipejalaika taun nyin kemari.
“Op Selamat 22 taun 2024 ngerikodka urung 354 kes aksiden ba jalai raya nyengkuam tujuh kes bebadi nyawa,” ku iya nengah sebengkah penerang sehari tu tadi.
Ku terang iya, tiga ari lima kes bebadi nyawa nya ngaul deriba motosikal lalu dua agi ngaul kes deriba kerita pikap enggau lori.
Mancha madah, polis mega udah ngeluarka 6,707 saman ngagai penguna jalai raya ketegal bemacham penyalah ba jalai raya sekumbang Op Selamat 24, ke dipejalaika pengelama enam hari berengkah 29 March.
“Statistik tu nurun 23.8 peratus tauka 2,097 saman dibanding Op Selamat taun nyin kemari. Penurun saman ke dikeluarka nengah Op Selamat 24/2025 serak tu laban PDRM lebih fokus ngagai advokasi sereta meri servis ngagai penguna jalai raya dikena ngelancharka pejalai trafik,” ku iya.-TVS
