SPAOH, 12 Dis: Perintah Sarawak nengah Ejensi Pemansang Bagi Menua Betong (BDDA) udah ngemendarka agih belanja penyampau RM5 juta dikena numbuhka tiga palan hemodialisis ba pelilih Betong.
Sapit Premier Sarawak, Datuk Amar Douglas Uggah Embas madahka, penumbuh palan nya ngambika ulih ngenataika servis ti pemadu manah ngagai pesakit tungkul sengayuh ti begunaka bantu di pelilih nya, ke alai pesakit majak nambah diatu.
Ku iya, bdda deka numbuhka tiga palan hemodialisis ba bagi menua Betong iya nya sama bela siti di Spaoh, Beladin enggau Kabong.
“Palan Hemodialisis udah dikemendarka agih belanja RM5 juta ari Betong Division Development Agencies (BDDA), ke alai tiga Palan Hemodialisis deka ditumbuhka, sama bela siti di Spaoh, Beladin enggau Kabong.
“Perengkaguna tu beguna amat laban majak mayuh perayat begunaka fasiliti hemodialisis.
“Diatu di bagi menua Betong, kitai semina bisi Sepital Betong enggau Klinik Pengerai Debak tang perengkaguna ba dia enda chukup,” ku iya.
Iya ke mega Chairman BDDA mansutka pekara nya pengudah Pengerami Nyuaka Chek Pampas Tanah Bagi Projek Sitak DUN N. 37 Bukit Saban ba Diwan Komuniti Spaoh, sehari tu tadi.
Chek pampas tanah ungkup empat projek ti dipejalaika ba sitak Bukit Saban baka Projek Taman Betanam Betupi Bebuling, Pengawa Ngaga Baru Klinik Pengerai Kelas Empat enggau kuarters, ngaga enggau nembuka Jalai Ulu Paku ke jajaran Ulu Kota sereta ngangkatmanah Jalai Ulu Paku enggau Jalai Penyulok ke Nanga Penebak Ulu Di Layar Betong.-TVS
