KUCHING, 12 Dis: Premier Sarawak Datuk Patinggi Tan Sri Abang Johari Tun Openg madahka, Bantu Tulung Barang Pemun Sarawak (SKAS) deka diberi sechara kredit nengah aplikasyen Sarawak Pay.
Ku iya madah, chara nya deka meri pemaik ke lebih manah, ngenyampatka proses meri bantu sereta nentuka raban ti patut dibantu ulih ngatur belanja enggau lebih mudah.
“Nya alai, kitai deka mantaika siti pelasar ke dikumbai SKAS iya nya skim bantu ngagai raban ke ditaga. Tang chara tu enda sama. Aku deka nerangka pekara tu ngagai rayat, proses tu enda sama baka ke meri mata duit. Kami meri bantu nengah akaun Sarawak Pay.
“Nengah Digital Voucher. Tu mai reti pemakai ti beguna penyampau RM100 tauka RM200 deka dibayar perintah,” ku iya.
Iya bejaku munyi nya dalam Program Randau Khas Pasca Bajet Sarawak 2025 ke dikeluarka TVS sereta dikemujurka siku tebangkar ekonomi tebilang ari Universiti Malaya enggau Kaban Kaunsil Profesor Menua Dr Muhammad Asri Mohd Ali.
Abang Johari nerangka, dikena bejalaika tuju nya, perintah nengeri deka ngungkupka penyampau RM450 juta taun baru ti deka meri pemaik ngagai lebih 850,000 penerima.
Sebedau tu, iya madahka skas rambau mantaika bajet sarawak 2025 rambau aum kunsil nengeri sarawak kena bulan 11 tu tadi.-TVS
