SARATOK, 11 Nov: Perintah Sarawak nengah Ejensi Pemansang Bagi Menua Betong (BDDA) udah ngemendarka agih sepenyampau RM15 juta dikena ngemanahka jalai ari Sekula Primari (SK) Mudong nuju ngagai Rumah Panjai Jimbun enggau Jalai Selalang di Mudong Saratok.
Kaban Kunsil Nengeri (ADUN) Krian, Friday Belik madahka, naka ke diatu projek nya benung bejalaika pengawa nyukat dikemujur raban penyanding penemu ke udah dichiri.
“Pia mega Ejensi Pemansang Bagi Menua Betong (BDDA) udah meri ungkup sepenyampau RM15 juta dikena ngemanahka jalai ari SK Mudong ngagai Rumah Jimbun enggau Jalai Selalang.
“Tu mega udah dikemendarka lalu benung dalam proses berati ejensi penyanding penemu,” ku iya.
Friday madah munyi nya nengah teks jaku iya ti dibacha pegawai ti megai tanggungpengawa ba Pelilih Mit Roban (SAO) Steve Miller Nuas, ba Pengerami Makai Lemai diatur Gerempung Apai Indai enggau Pengajar (PIBG) SK Mudong, empai lama.
Kelimpah ari nya, nengah Projek Transformasyen Menua Pesisir (RTP ku terang Friday, sepenyampau RM1.38 juta udah diungkupka dikena bejalaika bemacham projek pemansang di sitak Mudong enggau Kop Ibus.
“Sekeda projek pemansang benung dipejalaika baka Projek Transformasyen Menua Pesisir (RTP) sereta Program Ngemanahka Rumah Rayat Seranta Sarawak (PPRMS) sepenyampau semilan projek enggau penyampau semua RM1.38 juta,” ku iya.
Beduduk ari nya, iya ngarapka komuniti di sitak DUN Krian terus bejalaika tanggungpengawa sereta meri sukung ke tegap ngagai perintah besai enggau perintah Sarawak ngambika semua projek ke udah diperambu ulih bejalai enggau lanchar ungkup pemaik komuniti ke diau di sitak Mudong enggau Kop Ibus.-TVS
