KUCHING, 11 Nov: Perintah Sarawak deka terus nyendiaka geran dikena ngelakuka enggau ngasilka pengawa pansik sereta inovasyen ti meri pangka ke tinggi bepelasarka sains.
Premier Sarawak Datuk Patinggi Tan Sri Abang Johari Tun Openg madahka agih sepenyampau RM150 juta dikemendar taun baru dikena neruska pengawa ngaga Palan Penyakit Berampit Sarawak.
“Palan tu disadang tembu kena September 2026 lalu RM135 juta agi deka diungkupka dikena ngaga Palan Sains Sarawak ti disadang tembu manggai ujung taun 2025,”ku iya.
Iya madahka pekara nya maya mantaika perambu Bajet Sarawak 2025 ba Aum Kunsil Nengeri (DUN) pagi tadi.
Berebak enggau nya ku iya madah, penyampau RM25 juta deka disediaka ungkup Palan Biodiversiti Sarawak ba taun 2025 ungkup operasyen enggau mayuh bengkah pengawa pansik enggau pemansang (R&D).
“Dikena ngelakuka pengawa pansik pemansang dalam aplikasyen biodiversiti, sebuah Fasiliti Pansik enggau Pengeluar Lukut deka ditumbuhka ke dipelaba deka ngayanka pengawa nanam lukut ba renggat komuniti enggau nguji digaga di Gedong,enggau ungkup ti disediaka penyampau RM5 juta.
“Kelimpah ari nya, penyampau RM22.5 juta disediaka dikena meli tanah dikena nirika fasiliti ngeluarka mikro-alga beskala besai di Gedong,” ku iya.
Pemansang Mulung enggau Apung (SNDB) dikena ngelaku, ngemuntang enggau ngemansangka industri mulung enggau apung.
“Dikena nyukung R&D ke benung dipejalaika bekaul mulung enggau biomas mulung ke nelan kos penyampau RM18 juta ungkup Craun Research ba taun 2025,” ku iya. – TVS
