KUCHING, 11 Nov: Bisi 14 sitak industri deka dikemansang ba selampur Sarawak nengah agih sepenyampau RM40 juta ba taun 2025.
Premier Sarawak Datuk Patinggi Tan Sri Abang Johari Tun Openg madahka tu sebagi ari chara dikena negapka penuduk Sarawak nyadi palan ti dpilih alai beranakka puku di Malaysia.
“Projek besai nyengkaum kandang endur industri di Sibu enggau Bau, Taman Perindustrian Limbang, Kluster PKS Samalaju sereta kandang endur industri Rantau Panjang Fasa 2,” ku iya.
Iya munyi nya maya mantaika perambu Bajet Sarawak 2025 ba Aum Kunsil Nengeri (DUN) pagi tadi.
Nangkan ke nya, ku iya madah enggau infrastruktur ti bekualiti tinggi enggau insentif ke manah tu, kandang endur industri deka nyukung aktiviti mansut enggau penyampau ti besai sereta nambahka ekosistem industri Sarawak.
Iya mega madahka penyampau RM5 juta belanja diungkupka ba taun 2025 dikena ngemansangka Taman Industri Teknologi Tinggi di Kuching dikena nempa Sarawak nyadi wilayah ti pemadu beguna dalam industri semikonduktor.
“Taman industri tu deka mantu inovasyen dalam bidang semikonduktor enggau pengawa ngaga barang ti maju, nempa turai tukuh sereta pengawa Pansik enggau Pemansang (R&D).
“Timpai strategik iya nya dikena matak pemekuh R&D ti tebilang ari menua Eropah enggau Amerika Syarikat dikena nyadika Sarawak nyadi palan global ungkup teknologi ke mansang jemah,” ku iya. – TVS
