KUCHING, 9 Sept: Bisi 14 iku raban peminat ba leka main asal baka pantun Iban udah nyereta Kelas Belajar Pantun Iban diatur Akademi Gerempung Dayak Iban Sarawak (ASADIA) di Kota Sentosa ditu kenyau ujung minggu tu tadi.
Tuai ASADIA Mabong Unggang madah, iya berasai temegah meda ASADIA Kuching udah mujur ngempuru raban peminat pantun Iban ba kelas keterubah nya.
Ku iya, raban sida mega ngarapka kelas pantun ba renggat dudi deka mayuh mayuh agi rebak baru nyadi penyereta dikena ngetanka main asal Iban ngambika enda lenyau diserunyut jeman.
“Nyadi baka sehari tu kami ngatur kelas belajar pantun Iban.
“Tu siti ari leka main asal ti dikerinduka kami ASADIA ngambika orang ke rebak baru bala nembiak ulih nampung main asal kitai ke lama-lama ngambika iya enda lenyau dudi hari ila,” ku iya.
Mabong madah munyi nya pengudah ngelaluka penatai raban penyereta Kelas Belajar Pantun Iban diatur ba Akademi Gerempung Dayak Iban Sarawak (ASADIA) Kuching, empai lama.
Ku iya antara leman pantun Iban ti deka dipelajar nengah kelas tu baka Pantun Meri Ngirup, Pantun Puji, Pantun Peransang, Pantun Sayau enggau Pantu Serebana.
Tandu iya, sukung ari raban peminat seni asal pantun ti bisi ati deka enggau belajarka penemu leka main Iban nya meruan dikelalu.
Nya alai, ku Mabong barang sapa ti agi deka enggau masuk Kelas Belajar Pantun Iban nya betelefon terus ngagai iya empu nengah lumur telefon 012 6925562.
Ke penerang Kelas Belajar Pantun Iban ti nungkatka rambai jaku ‘Main Asal Kitai Tanggung Pengawa Kitai’ nya diajar siku tebangkar bepantun iya nya Charles Gerugu ke mega landik ba leka main asal ke bukai baka ramban, dungai enggau beganu.-TVS
