BETONG, 7 Julai: Mensia mayuh lebih agi ke diau di bagi menua tu ke ngembuan penyiru ngetan enggau nyaga pesaka ngepan Iban diperansang nyadi kaban Kelab Ngepan Betong (KNB).
Chairman KNB, Sigat Anak Sang madah, taja pia peminta deka lebih diberi ngagai sida ke endang bisi penyiru enggau deka besaup ngangkatka ngepan Iban ngagai tikas ke lebih tinggi.
“Kelab Ngepan Betong sigi meransang semua kitai ke endang bisi penyiru ngagai ngepan Iban sereta bisi ati sama deka enggau nyungkak ngepan Iban ngagai tikas ke lebih tinggi,” ku iya maya dirandau TVS ditu, apin lama ke udah.
Udah nya ku Sigat, sida ti udah nyadi kaban KNB mesti angkun sereta regas nyereta aktiviti ke diatur ba dedini endur nyengkaum ba luar menua Betong.
“Naka tu kami meri pengelebih ngagai kitai ditu (Betong) ngambika sama ulih nyadi kaban KNB.
“Siti utai pesan aku iya nya udah masuk nyadi kaban Kelab Ngepan Betong anang enda enggau kami ngelakuka gerempung tu.
“Nyadi diatu pengelebih sigi diberi kami ngagai bala kitai ke ngembuan pengerindu, sama bisi ngembuan pengangkun ati deka nyungkak pemanah ngepan Iban,” ku tandu Sigat.
Ungkup penemu, KNB ditumbuh kena 9 Mei 2017 lalu diatu bisi 120 iku kaban.
Penerang silik pasal KNB tau betelefon terus nuju Sigat empu ba lumur telefon 019- 858 1590. -TVS
