GEORGE TOWN, 1 Jan: Peninju Nasional ke mega anak Sarawak, Daeloniel McDelon Bong tauka Kilat Boy baka ke disadang mujur ngerebut gelar champion kategori 57 kilogram (kg) ba Pekit Tinju Entarabansa Pulau Pinang ke diatur ditu malam tadi.
Kilat Boy ngarika Kaunsil Lumba Menua (MSN) mujur numbangka siku peninju ke mayuh peneleba ti ngarika Soldadu Darat, Jemis Wong Lee Onn nengah main tiga renggat lalu ngemataka seduai bela bendar bepupuh nguji ngalahka pangan diri.
Ngelansa sentang pemujur nya, Kilat Bot madah diri berasai amat temegah lalu enda ngadang diri menang ngelaban siku peninju ke chukup mayuh peneleba.
“Ba renggat keterubah aku terus ngasak nyentuk iya berasai takut lalu aku neruska pengering sampai renggat ketiga.
“Taja pan nemu aku udah mayuh poin, aku takut mimit main nya majak angat nyadi aku semina ngerunding nguji belaban enggau pengabis manah ba ketetiga main,” ku atlit asal ari Sri Aman ke beumur 23 taun nya maya dirandau TVS, Hari Enam.
Pengawa nyuaka perais dikemujurka Presiden Gerempung Tinju Pulau Pinang, Mejar (B) Wan Abdul Hamid Wan Mahmood.
Kelimpah Jemis ke bulih midul pirak, pengari MSN, Alif Akmal Muhamad Asri enggau pengaro Sumatera Utara ari Indonesia, M. Iqbar Rasokismktupang bela pulai mai midul engkeraju ba kategori 57 kg.
Kelimpah ari nya, taja dipeda kering maya ngalahka orang ke dilaban, Kilat Boy madah iya betapi enggau pemar laban pekit serak tu enda chukup jam belelak.
“Sebedau enggau pengudah Lumba Malaysia (SUKMA) (bulan Oktober), aku bedau sempat belelak lalu tu pekit keempat aku minggu tu kelimpah pekit kedua dalam bulan tu.
“Aku deka ngambi kemisi dua tauka tiga hari sebedau datai baru belatih dikena nyikpa diri ungkup Trofi Malaysia di Nilai, Negeri Sembilan kena 23 nyentuk 28 Januari,” ku iya.
Pekit Tinju Entarabansa Pulau Pinang ke diatur berengkah 27 Disember tu tadi nyentuk malam tadi ngemataka bisi tujuh kategori diperebut ari 51 nyentuk 92 kg dipasuk tim ari MSN, Soldadu Darat, Sumatera Utara enggau Bali ari Indonesia, Hong Kong sereta Singapura. – TVS
