KUALA LUMPUR, 11 Nov: Menteri Besai Datuk Seri Ismail Sabri Yaakob ngelancharka Agenda Nasional Malaysia Sihat (ANMS) sehari tu.
Ngambi penerang ari Bernama, Iya madahka, tuju ANMS nya dilancharka dikena nyendiaka Keluarga Malaysia napi pemar sepemanjai renggat endemik COVID-19.
Pia mega, ANMS ditumbuhka dikena nerenak budaya enggau chara idup ke gerai enggau nyaga pemanah rampa menua ti nyukung pengelantang enggau pengerai Keluarga Malaysia.
“ANMS dilancharka dikena nyadika Keluarga Malaysia seruran gerai enggau ngasaika pengelantang sepemanjai idup,” ku iya madah.
Iya madahka, agenda nya nyadi sebagi ari pakej pengelantang pengerai ti udah diperatika silik, diperambu sereta dibantaika perintah nengah Opis Menteri Pengerai (KKM) ti nyadi pengemun ti disereta Opis Menteri Pengawa Berumah enggau Kaunsil Kandang Menua.
“Agenda ANMS dipejalaika dalam timpuh 10 taun iya nya ba pun ari taun 2021 nyentuk ke 2030.
“Pengawa bejalaika agenda tu dibagi ngagai dua penggal iya nya penggal satu ba pun ari taun 2021 nyentuk ke 2025 enggau penggal kedua ba pun ari taun 2026 nyentuk ke 2030,” ku iya madah agi.
Iya mansutka jaku nya lebuh ngelancharka ANMS ti dipancharka terus nengah program Selamat Pagi Malaysia.
