BETONG, 09 SEPT : Apai indai enggau pengibun nembiak dipinta bela datai enggau anak sida betuchuk vaksin Covid-19 laban sida dipinta nyain surat pemendar anak sida betuchuk vaksin.
Adun N.36 Layar, Yb Gerald Rentap Jabu madahka program betuchuk vaksin ungkup nembiak ke beumur 16 nyentuk 17 taun deka diatur ba palan alai betuchuk vaksin (PPV) Dewan Panglima Rentap di Betong, berengkah 10 September tu ila.
“Aku ngelalau bala nembiak, apai indai, enggau pengibun nembiak ngambika sama nyukung program tu, datai nitihka hari bulan ke udah ditetapka ngambika proses program tu ulih bejalai enggau lanchar. Tu mega dikena kitai nyapai imuniti beraban, ke alai diatu kes positif di Betong majak nambah”, ku iya.
Nangkan ke nya, program betuchuk vaksin ungkup nembiak tu diatur ngambika ulih nyaga pengerai enggau pengelikun sida laban sekula deka berengkah dibuka baru.
