SRI AMAN, 9 Sept: Projek Transformasyen Menua Pesisir (RTP) sitak Kunsil Nengeri (DUN) Simanggang bejalai lanchar taja napi pengekai igi penyakit Covid-19.
Menteri Muda Pengelantang Komuniti, Datuk Francis Harden Hollis suah ngatur aum enggau ejensi bejalaika projek nyentuk ke proses chabut undi dikena nentuka status RTP nitihka kriteria ti udah ditetapka Panel Komiti Sebutrega di Bagi Menua Sri Aman.
Bisi tiga chara chabut undi kunterik projek RTP iya nya nengah chabut undi, Komiti Pemansang enggau Pengelikun Genturung Pendiau (JKKK) sereta nengah JKKK Pengawa Beripai.
“Kitai suah ninga peranak rumah panjai madahka projek ukai ari pengari rayat laban enti Opis Kereja Raya (JKR) tauka Opis Tali Ai enggau Parit (JPS) enggau Opis Kandang Menua (MDSA) ti bejalaika projek nya dikumbai projek sida.
“Tetiap projek RTP iya nya ari pengari rayat Gabungan Parti Sarawak (GPS) ti diberi ungkup RM5 juta ninting taun ari perintah nengeri Sarawak,” ku iya dalam siti penerang kena Hari Tiga.
Harden ke mega Kaban Kunsil Nengeri (ADUN) Simanggang madah, projek RTP tu juluk perintah GPS deka ngemansangka kandang menua pesisir serata ngangkatka tikas ekonomi rayat.
Ku iya, ejensi bejalaika projek RTP deka nyendiaka keretas kereja nitihka skop enggau ungkus siling sesebengkah projek sebedau dipesetuju pengari rayat.
Ba awak ke sama, Harden bisi meri chek Projek Mit Menua Pesisir (MRP) penyampau RM5,000 ngagai Kelab SOKANJAYA JKR Sri Aman.
Berebak enggau nya, iya ngarap rayat enda nguna manah projek ti diberi perintah.
