KUCHING, 9 Sept: Opis Menteri Industri Ladang Enggau Komoditi Malaysia (MPIC) sereta komiti (AJK) Pengatur Pengerami Hari Malaysia Renggat Nengeri Sarawak 2021 nemuai meri basa ngagai Kepala Menteri Sarawak, Datuk Patinggi Abang Johari Tun Openg, kena Hari Empat.
Tuju penemuai iya nya berandauka sentang kuing industri komoditi baka sawit enggau lada di Sarawak.
Menteri Industri Ladang Enggau Komoditi, Datuk Hajah Zuraida Kamaruddin Madah, Sarawak merambu deka ngurangka bepanggai ngagai pekereja ari menua luar enggau benung dalam proses nguji mesin dikena nambahka asil sawit.
Ku iya madah tu laban Sarawak entara nengeri pengeluar satu per tiga sawit di Malaysia.
“Nyadi ba timpuh pandemik perintah kitai mega udah ngurangka bepanggai ngagai pekereja ari menua luar.
“Nya alai, Datuk Patinggi tadi bekunsi enggau aku siti program xuan hwa ke diatu dalam proses nguji mesin ke ulih diguna ngambi sawit, ” ku iya maya ba penemuai meri basa ngagai Kepala Menteri ba Wisma Bapa Malaysia ditu, sehari tu tadi.
Penemuai AJK Pengerami Hari Malaysia Renggat Nengeri Sarawak 2021 ti diketuai Menteri Pengangkut, Datuk Lee Kim Shin ti ngelaluka kepala menteri ngulu Pengerami Hari Malaysia ti diatur chara hibrid di DUN Sarawak kena 16 haribulan semilan tu enggau ditaka 100 iku temuai datai.
Sama bisi datai iya Menteri Muda Orang Indu, Ruang Bilik Enggau Pemansang Nembiak Mit Sarawak, Datuk Rosey Yunus enggau Menteri Muda Kaunsil Kandang Menua Sarawak, Datuk Dr. Penguang Manggil.
