KUALA LUMPUR: Opis Menteri Pemansang Orang Indu, Ruang Bilik Enggau Komuniti (KPWKM) sedia bekerejasama enggau raban ke bekaul dikena nentuka program tuchuk vaksin ngagai nembiak beumur 12 taun nyentuk 17 taun bejalai lanchar.
Pengawa tu seraya ulih mantu nyapai imuniti beraban enggau jampat agi.
Menteri KPWKM, Datuk Seri Rina Mohd Harun dalam siti penerang ngelalau apai indai meransang anak sida ngambi tuchuk vaksin.
“Teruska meri penemu sentang covid-19 ngagai anak. aku ngarap apai indai seruran nemu, bejejaga enggau ngasika standard atur pengawa (sop) dalam nagang pengekai covid-19 dikena nyaga diri sebilik.” ku iya.
Ku iya madah, apai indai mega dilalau meri penerang ke betul sentang Covid-19 seraya nyungkak pemereti ati sida dikena nyeliahka berita selebubu ngapa.
Sebedau tu, Menteri Pengerai, Khairy Jamaluddin madahka bisi 76,400 iku nembiak beumur 12 nyentuk 17 taun di Sarawak nyadi raban keterubah nerima vaksin.
Opis menteri KPWKM nyambut manah program meri vaksin kelai perintah ngemeratka pengerai rayat.
