KUCHING: Standard Atur Pengawa (SOP) nutup opis perintah lebuh bisi ngerikodka kes COVID-19 ulih ngeruga pengawa mulaika pemanah ekonomi menua.
Sapit Kepala Menteri Tan Sri Dr James Jemut Masing madahka, virus penyakit tu endang ditemu bisi ba serata nengeri lalu enti sema SOP tu dipejalaika tetiap kali kes COVID-19 dirikodka ba opis perintah ulih ngelubahka pengawa perintah mutarka penanggul ke ngaul penyakit tu.
“Menua mesti ngiga jalai idup begulai enggau virus tu.
“Enti sema opis perintah suah ditutup ketegal bisi kes positif ke ngaul pekereja sekalika siku tauka dua iku, kitai agi lama tepekul ba timpuh ke mayuh pemar tu,” ku iya madah ba dalam siti penerang maya hari Tiga.
Masing ke mega Menteri Infrastrakcha enggau Pemansang Penyangkai Kapal madahka, pengawa dagang enggau industri mega tekeruga tebal agi pekereja ke nerima gaji hari.
“Tu berindik ari pengawa dagang laun dibuka ketegal proses nembuka enggau ngemendarka dokumentasyen ke diguna opis perintah,” ku iya madah.
Kelimpah ari nya, iya nerangka senentang pengawa suah nutup opis perintah ketegal kes COVID-19 ulih ngeruga Pelin Mulaika Pemanah Menua (PPN) sereta penanggul bukai ke enda disadang nyadi.
“Perintah mesti nyendiaka chara nyungkak ekonomi ke lebih strategik seraya idup begulai enggau pemisi virus tu awakka sektor peribit mega ulih ngaul diri ba perambu mulaika pemanah menua.
Masing madahka, naka ke diatu Opis Menteri Pengerai (KKM) bejalaika pengawa ke patut iya nya nukar Sarawak ke renggat dua enggau tiga PPN dikena mulaika pemanah ekonomi.
