KUCHING, 8 Ogos – Perintah Sarawak nengah Opis Menteri Nembiak enggau Lumba seruran nyaga pengelantang raban atlit di nengeri tu.
Sekalika atlit Lumba Sarawak (SUKSAR) enggau Lumba Malaysia (SUKMA) seraya nanyaka berita sereta meri bantu pemakai tebal agi atlit ke diau di Kuching sereta jauh ari menua diri.
Ku Menteri Muda Nembiak enggau Lumba, Datuk Snowdan Lawan madah, opis menteri mega semampai deka nemu pengerembai pemadu baru sida tebal agi sepemanjai COVID-19 tu mayuh program lumba dikinsil tauka ditangguh ti ngujungka atlit nadai ulih ngaul diri dalam aktiviti main enggau lumba.
“Kitai deka nentuka tanggungpengawa ke patut terus dipejalaika taja pan aktiviti lumba nadai diatur lalu kitai deka nentuka sida seruran madahka pengerembai sida ngagai kitai,” Ngambika sida seruran belatih sekalika ba palan ke bisi disediaka tauka ba rumah.” ku iya madah lebuh dirandau pengarang berita TVS maya hari enam.
Kelimpah ari nya, Snowdan mega ngelalau nembiak rebak baru anang mudah putus pengarap enti sema pengawa ke dikereja enda mujur tauka bisi penanggul.
“Nyadi, diatu ambika chunto baka Pandalela taja pan iya enda mujur bulih midul dalam Olimpik 2021 tang kitai tetap temegah ati laban iya udah mujur masuk ba penuduk ke-12 iya nya entara 12 iku atlit pemadu manah ulih bepekit ba dalam Olimpik tu tadi.” ku iya madah agi.
Iya madahka, Pandalela tetap deka terus besemekih sereta nagit deka bepekit ba dalam Olimpik Paris 2024 udah tu ila.
Kelimpah ari nya, opis menteri deka ngiga atlit baru ke ulih dilatih ngambika ulih ngarika menua baka Pandalela dudi hari.
Iya mansutka jaku nya lebuh ba aum pengarang berita sepengudah program ‘Meet-up Sarawak Development Athletes’ ba Palan Akuatik Pandelela Rinong maya hari enam.
