MERADONG, 8 Ogos – Perintah nengeri udah ngemendarka duit turu RM200,000 ba baruh projek Transformasyen Menua Pesisir (RTP) ungkup dua projek ba pelilih Meradong.
Kaban Kunsil Nengeri Meradong, Datuk Ding Kuong Hiing madahka, projek nya nyerangkung ngerataka taba rumah baru Rumah David Nyalin, Tanah Putih enggau ngemanahka tikas perengkaguna ba Rumah Bangie, Skim B Meradong ti bela beungkus RM100,000.
Beduduk ari nya, Ding madahka, projek RTP nya deka dipejalaika berenggat nitihka penyampau duit turu ke udah diungkupka perintah Sarawak tetiap taun.
“Tu iya nya duit turu ti dikemendarka perintah Sarawak ti komited deka nyendiaka infrastrakcha, utiliti sereta perengkaguna rama bukai ke ngelantangka agi pengidup rayat tebal agi di menua pesisir seraya ngangkatka tikas pengidup sida ngambika lebih manah agi,” ku iya madah lebuh ditelefon pengarang berita TVS apin lama ke udah.
Iya madahka, kunteriktor deka dipilih nengah ejensi ti bejalaika projek nguna chara chabut undi.
Nangkan ke nya, iya nyemetak madahka, projek RTP ke dipejalaika perintah Sarawak kenyau ari taun 2016 udah mayuh meri pemaik sereta pengelantang ngagai rayat di sitak DUN Meradong.
“Taja pan pia, sukung ngagai perintah Sarawak iya nya Gabungan Parti Sarawak (GPS) chukup dikemeratka dalam timpuh lima taun agi awakka projek RTP terus ulih dikemansangka ba DUN Meradong,” ku iya madah agi.
Berebak ari nya, peranak Rumah Panjai David Nyalin enggau Banggie meri pengaga ati ngagai perintah Sarawak laban udah ngungkupka duit turu dikena bejalaika projek RTP ba genturung pendiau sida.
