BETONG, 7 Julai: Bisi 268 kangau emejensi dirikodka Balai Bomba enggau Penyah Penusah Malaysia (JBPM) Zon Tiga Sri Aman ungkup timpuh ari Januari nyentuk June taun tu.
Tuai JBPM Zon Tiga Sri Aman, Penguasa Bomba (PgB) Muhammad Rais Adham Rosalan madah taja pia trend nya diperati kusut nyema dibanding enggau timpuh ke sama ba taun siti nyin kemari.
“Statistik kangau emejensi ke diterima kitai taun tu ari Januari nyentuk June bisi 268 kes lalu enti dibandingka enggau timpuh ke sama taun nyin kemari kitai meda rikod kangau bisi nurun.
“Tu mungkus kangau tasah angus iya nya 54 kes dirikod taun nyin kemari, nyadi taun tu kitai mujur nurunka penyampau nya ngagai 48 kes,” ku iya.
Iya madah munyi nya maya dirandau TVS pengudah Pengerami Awal Muharam 1446 Hijrah diatur PERKIP Pampang Betong enggau Balai Bomba enggau Penyah Penusah Malasia Pampang Betong di Surau Darul Kashfiyah, kemari.
Ku tandu iya, penurun statisti kangau nya asil ari pengeransing pengawa semua raban ke bekaul.
Ke penerang, bisi tiga JBPM dibaruh kemata Zon Tiga Sri Aman iya nya JBPM Sri Aman, JBPM Betong enggau JBPM Saratok.-TVS
