BETONG, 7 Julai: Opis Bomba enggau Penyah Penusah Malaysia (JBPM) Zon Tiga Sri Aman udah tu deka terus chakah agi ngatur Program Licha Mensia Mayuh Pasal Aktiviti Pengelikun ba Ai (MKAA).
Tuai JBPM Zon Tiga Sri Aman, Penguasa Bomba (Pgb) Muhammad Rais Adham Rosalan madah, pengawa ngatur licha nya chukup beguna beduduk ari penambah rikod dalam timpuh enam bulan ke udah bepelasarka statistik kangau tasah ke ngaul kes lemas diterima sida ba Balai Bomba Sri Aman.
“Tu chukup ngirauka raban kami mih lalu kami mega bisi merambu sekeda program dikena negapka penyedar runding mensia mayuh nengah chara ngatur aktiviti pengelikun ba ai.
“Siti ari program nya deka kena sengkaum dalam Program Manggut iya nya bala kaban kitai (bomba) deka mandangka demonstrasyen tauka eksibisyen bekaul enggau pengelikun aktiviti ba ai,”ku iya.
Iya madah munyi nya maya dirandau TVS pengudah Pengerami Awal Muharam 1446 Hijrah diatur PERKIP Pampang Betong enggau Balai Bomba enggau Penyah Penusah Malaysia Pampang Betong di Surau Darul Kashfiyah, kemari.
Ku iya, penyereta ari mensia mayuh chukup beguna dikena nentuka tuju program dikena meri penyedar bekaul pengelikun aktiviti ba ai ulih dijapai.
Sebedau tu, licha pasal pengelikun aktiviti ba ai nya kala diatur nyerumba Program Bomba Komuniti di Layar enggau Lingga.
Udah tu ila, aktiviti ke sebaka deka diatur nyerumba Pesta Manggut kena 19 nyentuk 21 Julai tu.
Ungkup timpuh bulan Januari nyentuk June 2024, bisi lima kangau bekaul kes lemas dirikodka nyadi ba opis JBPM Zon Tiga Sri Aman dibanding semina siti kes taun 2023.-TVS
