SARATOK, 12 Dis: Raban pekebun lebih agi ba kandang menua pesisir diperansang nguasa teknologi betanam betupi moden, seriran enggau pengerembai teknologi digital kemaya hari.
Kaban Kunsil Nengeri (ADUN) Krian, Friday Belik madah, raban pekebun lebih agi ba sitak Krian nadai ngembuan mayuh pilih, kelimpah mesti nyingkang ke mua sereta ngalih ngagai pengawa nguna teknologi ke deka dikemeranka sechara besai jemah ila.
“Program betanam betupi mayuh endar insur ari segi teknologi orang diatu bekebun ngena chara begunaka teknologi sekalika nya nanam, maja, nyaga tauka chara bejual.
“Semua utai dikereja tadi ukai semina dikena ngulihka ungkup makai kediri empu enti ulih ngelui ari kitai ke ngiga chukup diempa diguna diri empu awak ke bisi dijual dikena nambahka penatai pemisi ari segi ekonomi.
“Nya alai semua tu tadi begunaka chara ke baru,” ku iya.
Iya bejaku munyi nya rambau pengerami bejadika Pengawa Nutup Agriculture Community Outreach Programme (AgriCOP) ba Rumah Panjai Jabu Chundi, Nanga Senulau Budu Saratok, kemari.
Iya madahka, pekebun menua pesisir deka terus tinggal ari nguna teknologi betanam betupi moden nyema sida enda berubah tauka mengkang ngena chara lama.
Tandu Friday, pengawa nguna teknologi moden dalam sektor betanam betupi mega siti ari agenda besai perintah Sarawak deka nyapai status wilayah pengeluar pemakai besai manggai taun 2030.
Ungkup rikod, naka tu Program Agricop ba Rumah Panjai Jabu Chundi di Nanga Senulau Budu iya nya kali ketiga diatur ba DUN Krian.
Program nya dipejalaika atas inisiatif perintah Sarawak deka ngerapitka agi kaul enggau kerejasama entara opis betanam betupi enggau pengemeran industri ba kandang menua pesisir.
Kelimpah ari nya, program nya diatur mega dikena meri pengeludas sechara terus pasal teknologi betanam betupi ti pemadu baru ngagai raban ke disaran nengah siri licha, eksibisyen enggau demonstrasyen betanam betupi ngambika ulih nambahka penemu, penyedar sereta pengelandik rayat dalam sektor nya.-TVS
