KUCHING, 11 Nov: Agih belanja sepenyampau RM1.42 bilion disediaka dikena ngemanah sistem pengangkut Sarawak ba baruh belanja alternatif.
Premier Sarawak Datuk Patinggi Tan Sri Abang Johari Tun Openg madahka belanja tu deka diguna ungkup pengawa ngaga tiga arung jalai ungkup Transit Arus Autonomi (ART), ngaga begunan besai Depo Rembus, pengawa ngaga depo bas beentara sereta nyendiaka bas entara enggau ART.
“Projek Sistem Pengangkut Mengeri Kuching (KUTS) deka ngubah sistem pengangkut mensia mayuh di Sarawak enggau nyendiaka pengangkut pintar enggau nadai pemar ti nambahka pengulih dalam nyambung entara mengeri enggau menua pesisir.
“Inisiatif tu ukai semina nyungkak penumbuh ekonomi tang mantu dalam pemeruan rampa menua enggau ngurangka pengawa ngelepaska karbon,” ku iya.
Iya madah munyi nya lebuh mantaika perambu Bajet Sarawak 2025 ba Aum Kunsil Nengeri (DUN) pagi tadi.
Berebak enggau nya ku iya madah penyampau RM8 juta disediaka dikena bejalaika servis bas pintar di Miri enggau RM1 juta dikena ngaga terminal bas di Kapit.
Nangkan ke nya, tandu iya, siti pansik deka dipejalaika enggau jampat senentang pemansang Padang Bilun Antarabansa Kuching (LTAK) ke baru. – TVS
