KUCHING, 11 Nov: Pengawa betanam betupi terus nyadi sektor pemadu beguna dikena nyungkak ekonomi Sarawak lalu diatu wilayah tu ba penuduk keempat dalam tusun pemadu tinggi Pemansut Asil Dalam Menua (KDNK).
Premier Sarawak Datuk Patinggi Tan Sri Abang Johari Tun Openg madahka, Perintah Sarawak terus chakah ngaduka transformasyen enggau nguna manah teknologi sereta ngemeratka pengelikun pemakai enggau nempa wilayah tu pengeksport pemakai beresi jemah.
“Diatu Sarawak benung ngemansangka industri agropemakai dikena meransang transformasyen tu sereta numbuhka rentayan bekal ti tegap ungkup komoditi beguna baka nanas, nyiur, pisang, durian, udang, ikan enggau chapi,” ku iya.
Abang Johari mansutka penerang nya maya mantaika perambu Bajet Sarawak 2025 ba Aum Kunsil Nengeri (DUN) pagi tadi.
Ba awakka sama ku iya madah, Perintah Sarawak meransang pengawa beranakka puku ba sektor peribit dalam pengawa betanam betupi komersial enggau ngemesaika bungkur kandang endur dikena ngeluarka pemakai.
“Bajet 2025 deka nyendiaka ungkup sepenyampau RM6 juta dikena neruska pemansang infrastruktur ba mayuh bengkah Taman Agro.
“Dikena nyukung pengawa nupi udang, RM20.9 juta disediaka dikena ngangkatmanah Taman Akuakultur Loba Stoh ba Rambungan lalu ungkup pengawa berikan, RM9.5 juta ungkup ngemansangka Taman Akuakultur ba Samariang Batu,” tandu iya.
Udah nya, ba pengawa ngeluarka beras Sarawak diatu semina nangkup 32 peratus ari peminta di wilayah tu, Abang Johari madahka Perintah Sarawak mega chakah deka ngubah sektor padi enggau beras nyadi industri ti meruan.
“Naka diatu, urung 14,000 hektar udah ditetapka ungkup pengawa bumai di selampur Sarawak. Ungkup infrastruktur padi, siti skim beungkus RM1.0 bilion dikemendar lalu RM51 juta deka diungkupka ba taun 2025.
“Kandang endur bumai ti diberi fokus nyengkaum Stumbin Bijat, Lingga-Banting, Seduku, Gran enggau Entulang, Tanjung Purun, Lubok Punggor, Sundar enggau Limbang.
“Kelimpah ari nya, penyampau RM50 juta udah disediaka dikena meli tanah lebih agi ungkup Skim Padi Tanjung Purun, Kuching,” ku terang iya.
Ngelansa pasal program nupi chapi, ku iya madah agih sepenyampau RM10.6 juta diungkupka ba taun 2025 dikena numbuhka kebun dandang dikena pengawa betupi di Kuching, Serian enggau Betong.
“Palan tu deka nguna teknologi pemintar artifisyel (AI) dalam ngemansang pengawa nupi chapi ti efisyen enggau meruan seraya nyukung timpai Sarawak,” ku Abang Johari. – TVS
