BETONG, 11 Nov: Kaban Parlimen Betong Dato Dr Richard Rapu ngansak raban bekaul patut nambahka agi penumbuh Palan Pemulai Pemanah Ulah Dalam Komuniti (PDK) di sitak nya.
Ku iya madah, penumbuh palan nya chukup beguna dikena nentuka pengelantang raban oku terus diberi perati sereta nyadi pemudah chara ngagai bala apai indai ke nganjung anak sida ngagai palan nya.
“Aku ngarapka sekalika perintah nengeri tauka perintah besai ngaga tauka nambahka agi PDK di Betong laban kitai ba ditu mayuh pelilih.
“Enti ulih siti pelilih, sebuah PDK.
“Ambika chunto, sebuah gaga di Kabong, sebuah di Pusa ngambika apai indai mayuh palan ke ulih dipilih alai nganjung anak sida ti ba kategori OKU sereta anak sida nya ulih diberi program mulaika pemanah ulah, latih enggau ke bukai.
“Nya betuju ngambika potensyel anak sida ulih dikerembai,” ku iya maya dirandau media, empai lama.
Udah nya ku Dr Richard, penambah PDK di bagi menua Betong mega beguna laban ulih mantu ngurangka tating ti disan dua PDK ke udah bisi di pelilih Saratok enggau Betong.
Bepelasarka rikod ti diambi ari sistem ngatur penerang Raban Nyelai Pendiau (SMOKU) naka 31 Disember 2023, bisi 691, 427 OKU udah ngerejister diri ba baruh tujuh kategori nyelai pendiau ba menua tu.
Pia mega, di bagi menua Betong ngerikodka penyampau 794 iku OKU udah direjista ba baruh kategori ke sama dalam timpuh dua taun ke udah, berengkah 2020 nyentuk 2024.-TVS
