KAPIT, 11 Nov: Penumbuh Bomba Komuniti di menua pesisir udah mayuh meri asil positif ngagai pengelikun sereta ngurangka penyadi penusah angus nuntung komuniti di Sarawak.
Opis Bomba enggau Penyah Penusah Malaysia (JPBM) Sarawak naka ulih ngedut kaul enggau komuniti kelimpah ngajar sida ba sukut penemu dikena nyeliahka penusah angus.
Ku Penulung Direktor Unit Pengelikun Angus JBPM Sarawak, Penguasa Kanan Bomba I, Mohamad Fauzi Mohamat Kifli madah, bisi 89 raban tim bomba komuniti dipasuk 1,087 iku kaban kenyau iya ditumbuh taun 2021.
Bepelasarka rikod unit berengkah ari taun 2021 nyentuk Oktober 2024 taun tu dia statistik penumbuh bomba komuniti ba rumah panjai di selampur Sarawak iya nya manggai 89 tim sereta dipasuk 1,087 kaban ditangkan 46 iku raban bomba komuniti di Sarawak udah ditumbuh enggau penyampau kaban bisi 822 iku naka Oktober 2024,” ku iya maya dirandau TVS sehari tu tadi.
Bepelasarka statistik JBPM, raban bomba komuniti di Sarawak udah bejalaika 21 operasyen ngerara api tumu dalam timpuh tiga taun kepenudi.
Program ‘Komuniti Ku Sayang’ endang inisiatif dikena narak pemereti enggau nambahka penemu ngagai komuniti senentang pengelikun bekaul enggau penusah angus sereta ngedup kaul antara bomba sereta sida ke datai ari menua pesisir.-TVS
