BETONG, 11 Nov: Pengerami Ngintu Hari Orang Nyelai Pendiau (OKU) pelasar pemadu manah dikena nerenak pemereti pasal pemesai guna aspek sengkaum rama ngaul raban nya ba dalam pengidup komuniti.
Kaban Parlimen Betong, Dato Dr Richard Rapu madahka, program baka nya beguna amat, berindik ari raban OKU patut dibasa laban sida mega entara raban ti mai pemujur ba dalam pemansang menua tu, tebal agi nengah bidang lumba enggau main.
“Program baka tu nyadi endur enggau meri peluang sereta pelasar pemadu manah dikena kitai nerenak pemereti ngaul komuniti Malaysia senentang pemesai guna aspek sengkaum rama tauka inklutiviti raban OKU ba dalam komuniti.
“Nya mih batang tuju program tu, seraya kitai bela nambahka pengelantang OKU ba menua tu,” ku iya.
Iya mansutka jaku nya rambau Pengerami Ngintu Hari Orang Nyelai Pendiau (OKU) Renggat Bagi Menua Betong ti diatur ba Dewan Sri Metro Gemilang Politeknik Metro Betong, kemari.
Berebak enggau nya, Dr Richard ngelalau bala mayuh, kelebih agi apai indai lengkas ngerejista anak sida ti dikategorika OKU ngagai Opis Pengintu Pengelantang Komuniti (JKM).
Tu ngambika anak sida enda tinggal ari ngasaika perengkaguna enggau fasiliti ti disediaka khas perintah ngagai sida jemah.
Sebedau nya, iya bisi limpang ngambi bagi program senamrobik begulai enggau kurang lebih 240 iku penyereta ke nyerangkung bala pegawai enggau raban pengereja Opis Pengintu Pengelantang Komuniti (JKM) ti pelilih Betong ke diatur ba pelaman endur ngengkah kerita Politeknik Metro Betong.-TVS
