KUCHING, 11 Nov: Rang Undang-Undang (RUU) Bajet 2025 ti dibantaika Premier Sarawak Datuk Patinggi Tan Sri Abang Johari Tun Openg iya nya agih belanja ti bepelasarka rayat sereta ngayanka komitmen perintah Sarawak dalam ngintu pengelantang rayat.
Menteri Utiliti enggau Telekomunikasyen (MUT) Sarawak, Dato Sri Julaihi Narawi madahka tu ngayanka inisiatif Sarawak dalam ngenyampatka pengerembai ekonomi, meransang pemeranak puku peribit, nyendiaka peluang gawa enggau nempa ekonomi ti ngembuan daya pengulih sereta ulih besemekih.
Berebak enggau nya ku iya madah Sarawak nyendiaka asil penatai pemisi bagi taun 2025 penyampau RM14.2 bilion ke alai tu siti agi belanja ti pemadu besai dalam sejarah belanja Sarawak enti dibanding enggau RM13.3 bilion ba taun 2024.
Iya madah munyi nya dalam siti penerang meri timbal bekaul enggau perambu Bajet Sarawak 2025 ke baru udah dibantaika Premier Sarawak Datuk Patinggi Tan Sri Abang Johari Tun Openg ba Aum Kunsil Nengeri (DUN) Sarawak sehari tu tadi.
Nangkan ke nya ku iya madah, Sarawak nyendiaka ungkup ke besai dikena nyukupka penyampau bajet ari Perintah Besai bedau lama ke udah sepenyampau RM5.9 bilion.
Ngarika Opis Menteri nya, Julaihi meri besai terima kasih ngagai Abang Johari laban ke udah meri ungkup penyampau RM1.72 bilion ungkup pemansang servis ai, karan enggau telekomunikasyen.
Nengah belanja pemansang ti disediaka penyampau RM1.23 bilion ungkup ai enggau karan enggau RM0.49 bilion dikena servis telekomunikasyen, ku iya madah opis menteri chakah deka nyendiaka bungkur penuh ungkup servis utiliti enggau telekomunikasyen ke meruan sereta patut lebih agi di kandang menua pesisir. – TVS
