KUCHING, 10 Okt: Perintah Sarawak nengah Agensi Pemansang Bagi Menua Betong (BDDA) udah ngemendarka urung 72 buah projek naka bulan September taun tu.
Sapit Chairman Komiti Pemandu BDDA Dato Gerald Rentap Jabu madah, semua projek nya agi dalam bemacham renggat digaga enggau bisi mega kedua udah tembu baka Projek Betanam Betupi Jalai Kebun.
“Sekeda projek benung dilanggur, bisi projek ke udah tembu enggau ari segi nya kitai udah ulih bejalaika lebih ari 72 projek jam ke diatu.
“Nyadi ke bukai agi dalam perambu enggau bisi udah tembu baka projek jalai kebun ke udah ditengah enggau meri pengelantang ngagai raban pekebun kitai,” ku iya.
Gerald ke mega Sapit Menteri Nembiak, Lumba enggau Pemansang Pedagang Sarawak mansutka jaku nya maya dirandau pengudah Aum Komiti Pemandu BDDA Renggat Ke-3 2024 di Wisma Bapa Malaysia, ditu pagi tadi.
Ke penerang bisi 196 projek udah dilanggur deka digaga dibaruh BDDA lalu penyampau semua kos projek tu manggai RM1, 428, 700.00.
Ku terang iya, tebal agi projek ke udah dilanggur BDDA sebebdau tu udah diberi ngagai konsultan ungkup tuju nyendiaka pelin, ngabas taba enggau ke bukai.
Udah nya, ku iya komiti Pemandu BDDA diatu benung ngaluska atur projek input betanam betupi baka bantu baja, benih enggau ke bukai.
Nya alai, iya chukup andal semua projek ke udah dilanggur nya deka ulih bernegkah penuh abis laun pun taun baru.
Sama bisi datai semua kaban Kunsil Nengeri (ADUN) di Betong nyengkaum Kaban Parlimen Betong Dr Richard Rapu enggau bala tuai tauka pengari ejensi perintah ke bekaul.-TVS
