KANOWIT, 8 Ogos: Siku baya urung 14.4 kaki pemanjai mujur ditangkap Raban SWAT (Raban Penangkap Jelu Siga, Sarawak Forestry Corporation (SFC) ba Lubuk Kerubung, Sungai Kanowit, kemari.
Tuai Operasyen Unit SWAT Sarawak Forestry Corporation (SFC) Wilayah Sibu, Joshua Nyawai madah, baya katak nya tauka nama saintifik iya dikangau Crocodulus Porosus mujur ditangkap ba hari kelima operayen ke berengkah kena 3 Ogos tu tadi.
“Operasyen nya dipejalai bepelasarka ripot bisi tetemuka sarang telu baya ba sitak Melipis-Lipus.
“Urung lima kaban SWAT nepan dua buah kerita pikap enggau sebuah sebuah bot Etamax ngesah palan nya ke bepalan ba Diwan Lipus nyadi Operating Centre(OC),” ku iya madah nengah sebengkah penerang sehari tu tadi.
Ku iya, operasi nya mega ngaul sekeda ejensi dibaruh Komiti Pemutar Konflik Mensia-Baya nengah ejensi.
“Sitak operasyen tu udah dipejalaika kenyau 3 Ogos berengkah ari nanga Sungai Kanowit nyentuk ke sitak Geremai-Lipus enggau dipelaba tembu kena 12 Ogos tu.
“Operasyen tu berengkah Hari Enam ke udah lalu baya bisi makai siti ari umpan ke ditaut ba sepanjai palan operasyen,” ku iya.
Ku terang Joshua, peranak rumah panjai suah tepeda bisi besai ayan ba Lubuk Kerubung ngelama tu.
“Peranak menua nya madah reptilia nya kala ngachau baka ngagai perau enggau mega kala makai ukui tupi enda jauh ari kebun ke semak,” ku iya.
Udah nya Joshua madah, baya nya udah ditumbak di Kanowit.
“Operasyen tu deka diteruska sampai kami ulih tetangkapka siku agi baya indu ke besarang ba Melipis-Lipus ,” ku iya. – TVS
