MIRI, 7 Julai: Bisi 33 buah sekula ba sitak Marudi nerima geran Projek Mit Menua Pesisir (MRP) penyampau RM10,000 ungkup sekula primari enggau RM15,000 ungkup sekula sekondari.
Kaban Kunsil Nengeri (ADUN) Marudi, Datuk Dr. Penguang Manggil madah, raban Komiti Pemansang enggau Pengelikun Genturung Pendiau (JKKK) bela nerima agih belanja bepelasarka pemayuh rayat ke nguan rumah panjai.
“Aku udah meri agih belanja MRP ngagai semua 33 buah sekula dibaruh jaga sitak Marudi.
“Aku meri genap taun RM10,000 ngagai sekula primari lalu RM15,000 sekula sekondari. Nya endang udah dalam rintai aku.
“Pia mega enggau JKKK, aku meri genap JKKK ungkup 260 rumah panjai dibaruh jaga aku nitihka ikas ditetapka.
“Enti rumah panjai ke ngembuan pemanjai lebih 10 pintu, sida deka nerima mayuh agi dibanding sida ke mimit (pintu),” ku iya.
Iya madah munyi nya maya Pengerami Apresiasyen, Hari Pengajar enggau Gawai Raya SK St. Columba Miri di sebuah hotel ditu, kemari.
Ku iya, Perintah Sarawak nengah Unit Pekara Pengarap Bukai (UNIFOR) udah ngagihka belanja RM110 juta ungkup taun tu dikena mantu pengarap bukai ngaga sereta ngemanah rumah sembiang enggau sekula misyen.
Ari penyampau nya, RM20 juta diagih ngagai semua sekula misyen ba selampur Sarawak enggau penyampau RM113 ribu diagih ungkup genap sekula primari enggau sekula sekondari.-TVS
