BINTULU, 5 April : Pemayuh penerang ke ayan ba media rama patut ditisih dulu dikena nentuka pengamat sebedau iya dikerembai ngagai orang bukai.
Pekara tu mega beguna dikena nyeliah diri nyadung berita pelesu ke ulih ngeruga bemacham sukut nyengkaum kaul enggau pangan diri, ku Kaban Parlimen Selangau, Edwin Banta.
Beduduk ari nya, berita pelesu diperati ulih mai pengerusak kelimpah ngelabuhka pemanah nama sesiku orang, organisasyen, industri enggau mega menua.
“Media rama baru, patut diguna enggau bejimat, mesti berunding panjai maya nerima sesebengkah penerang nengah chara nisih pekara ke positif enggau negatif.
“Amat tauka enda, udah nya anang kiruhka penerang ke ulih ngasuh kitai pambar, belaya enggau pangan diri sereta ngeruga pengelantang menua,” ku iya.
Iya mansutka jaku nya maya bejadika Program Taklimat Isu-Isu Kemaya Hari diatur Opis Pemadah Malaysia Pampang Sarawak ba Rumah Maong, Sungai Annau Tatau ditu kemari.
Edwin mega madah ulah salah nguna perengka komunikasyen ke nadai tatak tu ulih muka ruang ngagai orang ke enda mereti ngereja ulah ke enda menuku.
Pekara tu deka ngujungka orang belaya, ngereja ulah kasar nyentuk ke kempang ngemedis orang bukai.
Program ti berambaika jaku ‘Penyebaran Maklumat Yang Sahih Ke Arah Masyarakat Sejahtera‘ nya ngail sekeda ejensi perintah baka Indu Opis Polis Pelilih (IPD) Tatau, Opis Pengintu Pengelantang Pendiau (JKM) Pelilih Tatau, Opis Pengerai Bagi Menua Bintulu, Balai Bomba enggau Penyah Penusah Tatau sereta Opis Pelajar Pelilih Tatau Sebauh.
Dulu ari nya, ejensi-ejensi bekaul bisi mantaika penerang ngagai mensia mayuh nengah aktiviti Randau Mensia Mayuh lalu ditampung enggau Pengawa Demontrasyen ngerara api.-TVS
