MURUM, 3 Mac: Perintah Sarawak udah ngemendarka empat stesyen betanam betupi ke baru ba sitak Kunsil Nengeri (DUN) Murum.
Pengawa nya dikena nyungkak servis Opis Betanam Betupi Sarawak lebih agi ngagai raban orang bumai enggau pekebun mit ba sitak nya.
Kaban Kunsil Nengeri (ADUN), Kennedy Chukpai Ugon madah empat Stesyen Betanam Betupi ke udah dikemendar iya nya di Tubau, Sungai Asap, Mentalun enggau Tegulang.
Ungkup stesyen betanam betupi ba Sungai Asap, projek nya udah diserah ngagai kunteriktor ke dipilih.
Aum koordinasi begulai enggau raban kunteriktor udah diatur Hari Lima tu tadi bepalan ba Pengentap Pendiau Baru Bakun (BRS) Sungai Asap.
“Nyadi Stesyen Betanam Betupi ba Sungai Asap tu udah dianti kitai.
“Iya ke disinu iya nya sida nadai ngembuan stor ke besai endur engkah asil betanam betupi.
“Nyadi lebuh asil betanam betupi tu datai ke Sungai Asap dia aku meda Sungai Asap nyadi sekut, palan nya chukup mit.
“Aku ngarapka nengah pengawa ngaga stesyen betanam betupi ba Sungai Asap, Opis Betanam Betupi ulih meri servis ngagai rayat kitai ba sitak tu mih,” ku iya.
Stesyen betanam betupi ke bepalan sepiak Stadium Sungai Asap nya ila deka bisi begunan opis, stor barang enggau kuarters bala staf.
Berebak enggau nya, sebuah palan penugung asil betanam betupi mega deka dikemansangka raban Opis Betanam Betupi ba Sungai Asap.
“Palan penugung ke udah dikemendar endur asil betanam betupi ke udah dikemendar.
“Nyadi aku dipadahka kemari raban JKR iya nya sida dalam proses ngelangkar tempa tukuh enggau kitai ngarapka CPC tu ulih dipejalaika enggau lengkas awakka asil ari orang bumai di sitak tu ulih dijual,” ku iya.-TVS
