SPAOH, 3 Mac: Raban pedagang mit di Makit Komuniti Spaoh dilalau patut pintar nyendiaka bemacham produk ke dijual sida.
Sapit Premier Sarawak Datuk Amar Douglas Uggah Embas madah, ari pemisi produk ke mayuh pilih dia deka mayak mayuh agi temuai ngusung Makit Komuniti Spaoh dudi hari.
“Bisi barang ke deka dibeli ba Spaoh nadai ba endur bukai nyadi tu mih pemar ngagai bala pedagang kitai ke bejual ditu enda tau enda ngiga mayuh agi barang awak ke ulih matak (mayuh agi) orang datai.
“Aku ngarap begunan tu mega deka nyadi siti ari pematak temuai ke Spaoh kelimpah mesti pintar matak orang ke Spaoh.
“Aku meda nengah pemisi sekeda kedai enggau makit tu peluang dikena kitai ngangauka orang ari ulu ari ili ke diau ngelinggi menua bela datai ke Spaoh,” ku iya
Uggah ke mega Kaban Kunsil Nengeri Bukit Saban madah munyi nya maya Bejadika Makit Komuniti Spaoh, pagi Hari Minggu.
Ku iya, kelimpah ari nya raban pedagang mega patut ngemeratka pemeresi ba premis diri lalu patut ngaga palan nya enda leju ditapatka bala temuai.
Begunan Makit Komuniti Spaoh bisi dua ringkat digaga Perintah Sarawak nengah agih Projek Transformasyen Menua Pesisir (RTP) beungkus RM5 juta.
Sama bisi enggau bejadika makit baru nya bini Uggah, Datin Noreen Mayang, Kaban Parlimen Betong Dr. Richard Rapu enggau ke bukai.-TVS
