SPAOH, 3 Mac: Bala Komiti Pengira Wang Menua (PAC) deka baum Hari Dua minggu baru.
Kaban PAC Dr Richard Rapu madah aum nya diatur dikena nentuka buah penemu enggau chara pemadu manah dikena mutar isu sekula repuk ba menua tu.
“Kitai (PAC) udah bejalaika sekeda atur sebedau tu ngangauka sekeda saksi lalu meri penerang pasal pengawa enggau atur ngemanah agi program-program sekula repuk ba selampur Malaysia…
“Nyadi kena 5 March iya nya Hari Dua minggu baru kami kaban komiti PAC deka baum lalu kami deka ngaga pemutus nama langgur penemu ti deka digaga ari asil runding ke diulih ari atur ke udah dipejalaika sereta penemuai ngagai sekula sebedau tu,” ku iya.
Dr Richard ke mega Kaban Parlimen Betong madah munyi nya maya ditanya raban media bekaul enggau isu sekula repuk ba menua tu bekau ari penemuai Kaban Komiti PAC ngagai Saratok enggau Betong ba pun bulan Februari tu tadi.
Sebedau tu, iya nya pun bulan Februari tu tadi bisi 10 iku kaban PAC diuluka Chairperson iya, Datuk Wira Mas Ermieyati Samsudin bisi datai nemuai ngagai empat buah sekula repuk ba sitak Parlimen Saratok enggau Betong.-TVS
