SARATOK, 3 Mac: Pemutus Opis Menteri Pelajar meri kuasa ngagai Direktor Opis Pelajar Nengeri Sarawak (JPNS) ngemendarka projek ngemanah sekula ke dipelanja Perintah Sarawak tauka raban ari Perintah Besai siti ke patut dipuji.
Ku Kaban Kunsil Nengeri (ADUN) Kalaka Mohamad Duri atur nya deka ngemuntangka proses bekaul enggau pengawa ngemanah sekula repuk ba selampur nengeri.
“Aku endang nerima manah pemutus digaga KPM laban ari pemisi atur kuasa ngemendarka pengawa ngemanah sekula tu dikemendarka nyadi tu chukup senutuk enggau atur sereta dikena mutarka penanggul sekula repuk ke agi tubah di nengeri Sarawak.
“Nyadi siti ari pengawa ke chukup manaha enggau patut dipuji ari raban KPM,” ku iya.
Iya mansutka jaku nya maya dirandau TVS pengudah Pengerami Makai Lemai Solidariti GPS ba Diwan Komuniti Sri Krian ditu malam kemari.
Sebedau tu, KPM nengah sebengkah Aum Komiti Pengatur Begulai Pemansang Pelajar Nengeri Sarawak udah meri kuasa ngagai Direktor JPNS ngemendarka projek ngemanah sekula ke dipelanja Perintah Sarawak tauka raban ari Perintah Besai.
Aum nya betuaika Menteri Pelajar, Fadhlina Sidek sereta Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn. -TVS
