LIMBANG, 7 Jan: Projek ngaga waterfront baru Medamit ke benung digaga deka ngubah landskap pemansang ba sitak menua pesisir nya enti iya udah tembu ila.
Kaban Parlimen Limbang Datuk Hasbi Habibollah madah projek nya ditaga tembu taun tu lalu ukai semina deka ngemuntang pejalaika ngelawa genturung pendiau ke besemak, tang mega deka nyadi palan ngatur bemacham program nyenglaum lumba ai baka lumba bot laju enggau regata.
“Tang kitai tadi bisi ngabas lalu Puji Tuhan meda dia udah bisi pemansang (projek).
“Manah tang bisi sekeda pekara nyangka deka diberi perati baka penyangkai perau enggau ke bukai laban enti orang belumba perau ba sepiak Medamit tentu patut bisi perengkaguna tu dikena ngemudahka sida.
“Nyadi aku ngasai enti ulih kitai minta raban NRDA nepu asai aku tiga, empat, lima ratus ribu agi dikena ngaga penyangkai perau tu lalu patut dipasuk dalam program NRDA,” ku iya.
Iya mansutka pekara nya sepengudah ngabas Projek Ngaga Waterfront Medamit enggau Kuala Mendalam lebuh Hari Enam.
Ku iya perintah nengeri dibaruh iring Premier Sarawak Datuk Patinggi Tan Sri Abang Johari Tun Openg mayuh bejalaika pemansang mungkur semua kandang endur nyengkaum ba utara nengeri tu.
Nya alai, iya minta raban kunteriktor ngemujurka projek bepelasarka rayat nengah NRDA tu ungkup pengelantang rayat nyengkaum ba menua pesisir.
Waterfront Medamit digaga enggau ungkus RM5 juta deka disikap enggau sebuah jelatung, palan kiosk, agu mensia mayuh enggau entepan kerita ke chukup kelimpah bisi digaga sebuah bansa bejual barang ke dikumbai ‘Anjung Usahawan Medamit’. -TVS
