Search
Close this search box.
Search
Close this search box.
Premier Sarawak, Datuk Patinggi Tan Sri Abang Johari Tun Openg benung nerang ngagai raban media pengudah ngabas Projek Genturung Pendiau Sungai Berdaun di Santubong, kemari. Foto Mohamed Raffiq (TVS).

Anang tepapa meli tanah murah, peresa dulu status ba JTS

KUCHING, 7 Jan:  Premier Sarawak, Datuk Patinggi Tan Sri Abang Johari Tun Openg meri tangkan deka bejalaika atur ke terit ngagai sekeda raban tauka barang sapa ke ditemu nyual tanah perintah ngagai mensia mayuh.

Iya madah, perintah nengeri betapi enggau isu berimba enggau pengawa ngentak ba tanah perintah nadai pemendar dikereja sekeda raban lebih agi ba kandang mengeri.

Abang Johari mega madah ulah enda mereti nya ngujungka orang ke meli tanah rugi beribu ringgit laban teperasa enggau rega tanah ke murah lalu ngujungka pekara nya ngamahka nama Perintah Nengeri.

“Bisi orang nipu ngambu tu tanah sida, sida nyual lot, bisi nya dibeli 5,000, 10,000 tang kebendar tanah perintah.

“Nyadi nya pekara ke nyadi, kitai ngaga rumah anang ba endur ke baka nya.

“Aku minta Opis Tanah enggau Survei meri penerang, lebuh JTS madah nya tanah perintah, nyadi kami enda ulih enda muru sida.

“Nyadi tu nyadi penanggul (ngumbai) perintah ngambi tanah orang, tang kebendar pekara ke nyadi tanah nya ukai tanah sida,” ku iya.

Abang Johari mansutka jaku nya ngagai raban media pengudah bejalai Ngabas Taba Projek Genturung Pendiau Sungai Berdaun di Santubong kena Hari Enam.

Ku terang iya, atur terit deka dipejalaika ngena akta enggau undang-undang ke udah bisi tang iya madah diri berasai asa laban pekara nya bisi kaul enggau orang politik.

“Undang-undang udah bisi, nama atur ke diambi tang orang politik nya mih (ngumbai) perintah ngambi tanah sida, taja pia kitai bisi bukti.

“Aku enda nuduh, tebal agi sida nya orang luar, datai ke Kuching, orang Kuching nemu dini genturung pendiau, tu ukai aku deka nganu, kitai enda ulih ditipu nyadi kitai deka mai pekara tu ngagai Opis Tanah enggau Survei, “ku iya.

Beduduk ari nya, Abang Johari minta raban penghulu enggau tuai raban bansa nyaup JTS lalu seruran nemu nama pekara ke bisi nyadi ba sitak diri awakka ulih mutarka penanggul ngentak rumah nadai pemendar nya.-TVS

TVS provides up-to-date news, captivating dramas, and diverse program which are disseminated via channel 122 MYTV, UnifiTV and ASTRO. Stream live via MYTV Mana-Mana, UnifiTV and ASTRO GO apps now.

Follow us on social media:
Facebook: @tvsarawak , @tvs122

Instagram: @tvsarawak, @TVS_Entertainment

Telegram: @tvsarawak

TikTok: @tvsarawak, @tvs_entertainment

X: @tvsarawak

YouTube: @tvsarawak, @TVSEntertainment


Berita Berkaitan