DEBAK, 1 Jan: Projek jalai baru Debak Laut-Dit sepanjai urung 2.2 kilometer (km) ke digaga dibaruh kemata Ejensi Pemansang Bagi Betong (BDDA) deka berengkah enda lama agi.
Sapit Menteri Pemansang Indu, Anak Mit enggau Komuniti, Datuk Mohd Razi Sitam madah, penembu projek jalai nya ila deka ngemuntang agi pejalai mensia mayuh ke diau besemak.
Ku terang Mohd Razi naka diatu projek ke beungkus RM9 juta nya baru udah tembu disukat raban Opis Kereja Raya (JKR).
“Siti jalai baru nyambung menua Debak Laut enggau Dit lalu rembus ba Rumah Panjai Buda Ulu enggau Rumah Panjai Buda Ili.
“Sida JKR udah nyukat pemanjai (jalai) tu…lebih kurang dalam 2.2 km baka nya.
“Nyadi tu ila deka ngemuntangka agi pejalai ari Dit nyengkaum sida ba Rumah Panjai Buda Ulu enggau Buda Ili nyema deka ke Debak. Diatu nengah jalai lama ngambi awak penyauh urung 10 km,” ku iya.
Mohd Razi ke mega Kaban Kunsil Nengeri (ADUN) Saribas madah munyi nya pengudah tembu Program Saberkas Prihatin ke diatur Saberkas Pampang Saribas ba Rumah Ujau Anau Buda Ulu ditu kena Hari Enam tu tadi.
Ku terang Mohd Razi entara tuju besai ngaga jalai nya ngambika Tanah Adat Bansa Asal (NCR) ba genturung menua nya ulih dikemansang.
Nya alai, Mohd Razi ngarapka rayat ke diau besemak ulih meri kerejasama awakka pemisi jalai tu jemah deka meri empas ngagai pemansang pemansang bukai.
“Siti ari kebuah perambu (projek jalai) tu mesti digaga dikena ngemansangka agi tanah puang ke bisi ba genturung menua tu ditu.
“Nya alai, aku ngarapaka mensia mayuh ditu ke bisi tanah sida kena pansa jalai tu ulih meri kerejasama ngambi pemansang bukai ulih dipejalaika.
“Aku andal genturung ditu manah dikemansangka tang sebedau nya mesti bisi jalai dulu,” ku iya.
Ba program nya, bisi 33 iku raban ari ruang bilik kurang pemisi ba Rumah Panjai Buda Ulu enggau Buda Ili bisi nerima bantu bekal pemakai.
Sama bisi datai bala tuai raban bansa sereta kaban komiti Saberkas Pampang Saribas.-TVS
