SARATOK, 27 Dis: Kaban Kunsil Nengeri (ADUN) Kalaka, Mohd Duri berasai gaga ati meda rayat ari dua buah rumah panjai di sitak Kalaka seati milih Parti Pesaka Bumiputera Bersatu (PBB) nyadi pelasar politik sida.
Ku iya, pemutus nya siti perais ke chukup besai reti ba iya ti nyadi pengari rayat ungkup sitak Kalaka.
Ku Mohd Duri, pengarap rayat ngagai parti PBB nyata ngayanka rayat deka perintah ti tegap dalam mai pemansang.
“Tu (sempama) siti perais besai ngagai aku ba taun ti kedua nyadi ADUN N.38 Kalaka lalu nyadi hari ti besejarah pengudah pengawa nyerahka pom nyadi kaban parti PBB ari dua buah rumah panjai iya nya Rumah Ikom di Senyawan enggau Rumah Embol ari Jelupang,” ku iya.
Iya madah munyi nya lebuh bejaku ba mua mayuh nyerumba Pengerami Ngintu Hari Krismas enggau Taun Baru 2024 ba Rumah Panjai Senyawan, ditu kemari.
Nangkan nya ku iya, enggau pemutus peranak ari dua buah rumah panjai nya ke nyadi kaban parti PBB mega deka ngemuntang ke agi atur pejalai projek pemansang ba kededua genturung menua nya udah tu.
“Meri besai terima kasih ngagai kededua tuai rumah laban udah arapka aku nyadi ketuai parti PBB pampang N.38 Kalaka.
“Udah tu, dikearapka mayuh agi projek pemansang ulih dikemujur seriris enggau peminta rayat rumah panjai ba sitak N.38 Kalaka,” ku iya.
Dulu ari nya, bisi 146 iku perayat ari Rumah Panjai Ikom Anak Sidom di Senyawan enggau Rumah Panjai Embol Asom di Jelupang Roban ke udah nyuaka peminta nyadi kaban PBB nyerumba pengerami Krismas enggau Taun Baru 2024 ba Rh Ikom Sidom di Senyawan.-TVS
