SARATOK, 15 Dis: Penyikap tauka pengawa ngadang diri tumu ari pangka Monsun Timur Laut (MTL) tauka musin landas ukai semina patut dikemeratka raban bomba tang mega nyengkaum bala komuniti.
Direktor Opis Bomba Enggau Penyah Penusah Malaysia (JBPM) Sarawak, Datu Khirrudin Drahman madahka, ari penyikap tumu nya dia deka ngurangka pangka penusah ke enda disadang.
Ku Khirrudin bepelasarka rikod enggau peneleba gawa ngelama tu chukup beguna ngagai sida ngambika pengawa ke dikereja nyadi muntang.
Taja pan menua sarawak tu besai maya penusah bah tang sida nadai ngasaika penanggul nya besai laban endang udah nengkira diri enggau tumu.
Pekara nya ngujungka perintah nengeri lebih arap ngagai raban bomba nengah komiti pengatur penyah penusah.
“Penyikap tu ukai semina ungkup bomba tang mega komuniti nya empu laban nyema sida udah besedia lalu nemu ni bagi patut dikereja.
“Nya ngujungka empas ari penusah bah ulih dikurangka lalu tu ulih diasaika kitai apin lama lebuh betapi enggau pengerekai Covid-19 sebedau tu.
“Penusah bah tu siti ari pekara ke nyadi ninting taun lalu MTL tu enda ulih diseliahka tang bekau ari penyikap ti betul empas iya ulih dikurangka,” ku iya maya dirandau raban media pengudah tembu Pengawa Bejalai Seraya Gawa Ke Balai Bomba Enggau Penyah Penusah Malaysia (JBPM) Saratok, ditu kemari.-TVS
