BINTULU, 26 Jan: Pelajar tumu anak mit siti pengawa ke pemadu beguna dikena ngambuh runding ke renggat pemun seraya dikena meransang sida rindu ngemeranka pengawa pelajar nyentuk ngagai tikas ke pemadu tinggi.
Kaban Kunsil Nengeri (ADUN) Murum, Kennedy Chukpai Ugom madah, apai indai ngembuan tanggungpengawa ke chukup besai dalam nentuk bala anak sida nerima pelajar ke pemadu manah ba renggat pemun.
“Kitai bisi KEMAS lalu nya antara pugu (palan pelajar tumu) ke pemadu manah ngagai semua.
“Palan tu seruran dibantu nyadi pekara ke pemadu beguna tu iya nya raban apai indai nyadi penyura (penyukung) ke chukup beguna ngagai Tadika tu,” ku iya.
Chukpai madah munyi nya maya bejadika Pengerami Konvokesyen ke-7 Tadika Akar Baik Pampang Lubuk Kubung Sesi 2023/2024 ba sebuah hotel di Bintulu lebuh Hari Empat.
Nangkan ke nya, ku Chukpai raban nembiak belajar ba palan pelajar tumu tu semina beberapa jam aja nyadi nadai kebuah apai indai enda nganjung anak sida ngagai endur nya.
Tu berindik ari pelajar tumu anak mit pekara ke chukup beguna lalu nembiak mesti dianjung belajar dia.
“Pelajar tumu tu (sempama) saham (apai indai) laban enti anak mujur nya meri penguntung ngagai sida empu enggau komuniti dudi hari,” ku terang iya.
Bisi lapan iku nembiak dirami ba konvokesyen nya dikena ngelai sida tembu belajar ba renggat tumu sebedau sida nyingkang ngagai Primari Satu.-TVS
