SARATOK, 14 Dis: Semua 16 buah klinik pengerai enggau dua buah sepital ba pelilih Betong diatu udah disikap enggau servis vaksin rabies.
Pegawai Opis Pengerai Bagi Betong Dr Mohamad Norhaizan Ahmad Narawil madah, nya ngujungka pelilih Betong nyadi pelilih keterubah di nengeri tu ngembuan genap klinik enggau sepital udah disikap enggau vaksin rabies dikena nentuka pengelikun mensia mayuh ke kala kena keramak tauka ketup jelu sekalika nya ukui tauka mayau.
“Ba seluruh Pelilih Betong kitai bisi dua iti sepital enggau 16 belas iti klinik pengerai bemacham kategori klinik pengerai, klinik komuniti enggau ke bukai ke alai ke semua 18 belas bengkah fasiliti tu udah disikap enggau vaksin rabies ungkup mensia,” ku iya.
Iya mansutka pekara nya maya Program Beperesa Pengerai Ungkup Komuniti Kampung Kaba ditu empai lama.
Nangkan ke nya, ku Dr Mohd Norhaizan opis pengerai mega udah sedia meri servis vaksin rabies ngagai mensia mayuh enda ngira ari ni penatai asal sida asal bisi buya kena ketup tauka keramak jelu enda ngira ukui, mayau tauka jelu bukai. -TVS
