LIMBANG, 9 Dis: Sitak Batu Danau begunaka mayuh agi perengkaguna lumba ngambika ulih endur ngatur bemacham pekit.
Kaban Kunsil Nengeri (ADUN) Batu Danau Dato Paulus Palu Gumbang madah perintah seruran bebendar nyendiaka perengkaguna lumba nyengkaum ba sitak menua pesisir.
Ku iya, perengkaguna lumba baka gelanggang futsal, diwan enggau balapan chukup beguna ngambika mensia mayuh lebih agi raban nembiak ulih ngatur bemacham pekit lumba.
“Laban ke nyadi sitak menua pesisir dia mayuh pengurang ari sukut infrastruktur pemun, nyadi nyengkaum infrastruktur ungkup lumba.
“Nyadi naka diatu nama utai ke digaga kami iya nya deka ngaga mayuh agi perengkaguna lumba, lalu antara nya bekaul enggau futsal, futsal enggau mayuh agi diwan laban dalam nya kitai ulih ngatur main tradisional,” ku iya
Iya madah munyi nya maya dirandau media pengudah tembu ngemataka Pekit Olahraga Purnama Sport Carnival (Purscar) 2023 di Kompleks Sukan Limbang pagi tadi.
Nangkan ke nya, Paulus ngarapka perintah ulih nambahka mayuh agi perengkaguna lumba ba sitak nya dikena nempa mayuh agi raban nembiak enggau atlit ke lati ba pengawa lumba.
Sama bisi ngulu program tu Residen Limbang Yunus Tambi, Pegawai Pelilih Limbang Sulaiman Engal enggau bala tuai opis perintah.-TVS
