KUCHING, 7 Dis : Serakup Dayak Iban Sarawak (SADIA) merambu deka ngatur Forum Adat Iban ke ngaul Adat Belaki Bebini dikena mutarka penanggul rama ke bisi nuntung sekeda ruang bilik.
Presiden SADIA Sidi Munan madah, forum nya begunaka timbal sereta sukung ari raban orang indu ngambika tuju forum nya diatur nyapai saran ke dikedeka SADIA.
“Dalam ati aku din patut projek kitai ke sehari tu tauka forum nya (diatur) laban bisi besangkut paut enggau adat kitai Iban lebih agi ba senentang adat belaki bebini di Sarawak.
“Nyadi nyema iya nyadi diatur arapka iya nerima sukung ari mensia mayuh lebih agi mai raban sida ke indu,” ku iya maya bejaku nyerumba Pengawa Beserumpu Ngerami Tamat Kelas Main Asal ASADIA Taun 2023 ba Balai Raya Gerempung Bansa Dayak Bidayuh (DBNA) ditu, empai lama.
Ku tandu iya, forum nya besai bendar reti dikena ngiri pemereti ati lebih agi ngagai raban apai tauka laki ti nadai ngirumka belanja ngagai menua sepengudah sida nurun belelang gawa ke menua bukai.
Tuju SADIA deka ngatur forum nya dikena nentuka pengelantang ruang bilik lebih agi ba komuniti iban.
“Iyaka ditemu aku diatu iya nya tu ukai munyi nganu orang lelaki tu sigi nganu sekeda kitai lelaki.
“Udah bebini, dia bini tinggal di rumah lalu diri empu (chunto) gawa ke Seria, ke Brunei tauka Malaya. Udah bulih pengawa din duit enda dikirum ke bini anak, nyadi nama dikena meli tusu (pemakai), mayuh orang enda nemu penanggul tu.
“Kati ku anak nadai utai pakai enda ke nya ngerusak bansa kitai, nyadi nya (penanggul) utai ke benung (diperundingka) kami diatu,” ku iya nerang ngagai mensia mayuh.
Ngelansa senentang pengerami malam nya, urung 280 iku penyereta kelas main asal ASADIA bela nerima setipikit diri ngaul Kelas Main Asal Ajat Indu Iban Renggat 15, Ajat Pua Kumbu Renggat 16, Ajat Lelaki Iban Renggat 15, Kelas Ngaga Kain Burie, Kuntau, Kelas Belikan, Sape, Gendang Pampat, Tanda Orang Ulu (Datun Julud), enggau Kelas Tanda Bidayuh.
Sama bisi datai ngulu pengawa nya Kaban KUnsil Nengeri (ADUN) Batu Kitang Dato Ir Lo Khere Chiang, Tuai ASADIA Mabong Unggang, Presiden SIKAR Basil Laman enggau ke bukai.-TVS
