ROBAN, 11 Nov: Sapit Menteri Nembiak, Lumba enggau Main sereta Pemansang Pedagang Sarawak, Datuk Dr. Ripin Lamat disadang datai bejadi ke Pesta Roban 2023 pagi tu.
Kaban Kunsil Nengeri (ADUN) Kalaka Mohd Duri madahka pekara nya udah dituku ke iya udah enggau Dr. Ripin empai lama lalu bemacham aktiviti udah ditusun dikena ngerichahka agi pengerami nya.
“Aku nerima berita manah malam tadi (kemari) ke alai Sapit Menteri ba Opis Pemansang Orang Dagang iya nya Datuk Dr Ripin Lamat deka nyadi temuai dipebasa kitai bejadika Program Pesta Roban taun 2023,” ku iya.
Mohd Duri madah munyi nya sepengudah tembu pengawa bejadi ke Pekit Batak Lampung ba Pangau Besai Pesta Roban 2023 kemari.
Nangkan ke nya, ku Mohd Duri lebih 10, 000 iku temuai disadang datai sepanjai timpuh pengerami nya lalu pekara nya ku deka nyadi sejarah baru ngagai Pesta Roban.
“Puji Tuhan sepengudah lapan taun kita ndai ngatur Pesta Roban sepengudah dibuka berengkah 3 November tu tadi, kitai ulih meda mensia mayuh sampal datai.
“Nya nyata nunjukka orang Roban enggau sida ke diau besemak chukup gagit laban pengerami tu nadai kala diatur kenyau lapan taun ke udah.
“Tu siti sejarah baru dalam timpuh lapan taun tu ungkup Pesta Roban lebih agi sepengudah Covid – 19 nyadi,” ku tandu iya.
Sama bisi datai Pegawai Nguasa Opis Pelilih Mit Roban ke mega Chairman Pesta Roban 2023, Steve Miller Nuas, bala tuai Opis Perintah Ba Pelilih Saratok, Tuai Raban Bansa enggau ke bukai.-TVS
