ROBAN, 11 Nov: Penyereta ari Saratok, Norsyafinas Mohd Azman, 25, dipadu ngempu gelar Champion Pekit Ratu Kebaya Pesta Roban 2023.
Bekau ari pemujur nya, Norsyafinas mai pulai perais mata duit sepenyampau RM1,000 disempulang enggau jumpang, trofi, selampai enggau setipikit.
Lebuh dirandau TVS sepengudah pemutus pekit dibantai kemari, Norsyafinas madah diri enda nyangka ulih nyadi champion laban penyereta bukai mega chukup manah sereta ngembuan pengelebih kediri empu.
“Kebendar aku enda nyangka diri ulih menang laban penyereta bukai mega ukai sebarang orang.
“Ukai aku siku aja nguji tang kesemua sepuluh iku kami nyengkaum aku empu endang nguji enggau naka ulih.
“Nya alai aku chukup beterima kasih ngagai Petara laban ulih ngatur pejalai enggau manah sereta ulih nyaut tanya enggau mujur ba atas pangau laban ukai mudah tambah tu mih keterubah iya aku bediri ba atas pangau ba mua orang mayuh begulai enggau penyeta bukai,” ku iya.
Udah nya, pemenang lumur dua Sheilleyline Story mega ari Saratok madah diri tetap tepantup ati taja semina teulih ke lumur dua laban tu keterubah iya enggau orang bepekit Ratu Kebaya.
“Berasai gaga laban enda kala masuk pekit baka tu tang ulih ga bulih lumur dua udah mega nguji enggau naka ulih lalu mujur datai ba renggat tu.
“Nya alai, meri terima kasih ngagai sida ke udah nulung nyura mua, ngias baju enggau semua mih,” ku iya.
Kepenudi, Julia Sulaiman, 28 ari Roban mega enda nyangka ulih bulih lumur tiga laban Pekit Ratu Kebaya Pesta Roban serak tu pekit keterubah dipasuk iya.
“Aku enda nyangka laban tu terubah iya aku masuk pekit baka tu amat enda nyangka diri bulih lumur tiga amat-amat enda nyangka.
“Enti bisi rejeki aku deka enggau orang bepekit ba Pesta Nenas enggau ba Sibu udah tu ila,” ku iya.
Ungkup penemu, bisi 12 iku pesereta ngambi bagi ba Pekit Ratu Kebaya Pesta Roban 2023.
Pemenang lumur dua pekit nya nerima perais mata duit sepenyampau RM800, lalu pemenang lumur tiga nerima perais mata duit RM600 bela disempulang trofi, selampai enggau setipikit.-TVS
