KUCHING, 9 Sept: Pemidang ex-Kaban Kunsil Nengeri (ADUN) Katibas Dato Ambrose Blikau chukup diasai raban Akademi Serakup Dayak Iban Sarawak (ASADIA).
Tuai Akademi Serakup Dayak Iban Sarawak (ASADIA) Mabong Unggang madah, niang Dato Ambrose Blikau antara pemesai Iban ke chukup angkun sereta siruka main asal Iban.
“Niang tu siku pemesai kitai Iban ti angkun sereta siruka main asal Iban.
“Nya alai maya iya nemu rita ASADIA deka ngangkatka main asal dia iya lalu ngangkauka aku sereta meri bantu belanja dikena ASADIA ngepunka Kelas Gendang Pampat.
“Nyadi pemidang niang chukup diasai kami, bela besampi ngarapka semengat niang begulai enggau roh orang ti kudus ba serega,” ku Mabong maya dirandau TVS, tadi.
Berebak enggau nya, Mabong ngarika raban ASADIA ngenataika penyinu ati ngagai sida niang Dato Ambrose Blikau sebilik ti udah ditinggalka niang pagi tadi.
Ungkup penemu, diatu ASADIA antara gerempung ukai dikuasa perintah (NGO) Dayak ke chukup chakah ngangatka main asal nengah pengawa muka kelas main asal baka Ajat Lelaki enggau Indu Iban, Saga’Ajai (Ajat Orang Ulu Lelaki), Betabuh Iban, Gendang Pampat, Birejang Beuh Indu enggau Lelaki (Bidayuh), Belikan (Iban), Sape (Orang Ulu) enggau Kuntau Iban. -TVS
