BETONG, 8 Ogos: Sekula Sekondari (SMK) Saratok ngembuan juluk deka terus ngetanka gelar champion ba Pekit Olahraga Kaunsil Lumba Sekula Betong (MSSB) Edisyen Ke-19 ke benung diatur ba Kompleks Lumba Betong ke berengkah 8 nyentuk 11 Ogos tu.
Tuai Jurulatih Sekula Sekondari (SMK) Saratok, Stanley Wilson Gunong madah, iya andal juluk nya ulih dijapai bekau ari gaya pemanah rikod sebedau tu enggau semangat nyadi champion bala nembiak iya diatu chukup tinggi.
“Baka ke taun tu peda aku pait mimit deka ditan tang naka ulih mih bala nembiak ditu ngetanka penuduk champion penuh nya tadi.
“Asai aku taun tu (SMK Saratok) agi ulih ngetanka penuduk champion,” ku iya maya dirandau TVS ba Kompleks Lumba Betong, pagi tadi.
Taja pia ku Stanley, ba pekit serak tu sida deka betapi enggau pemar berindik ari pengulih atlit sekula bukai mega majak manah.
“Munyi ku aku tadi laban taun tu sekula bukai pan nyau majak tegar.
“Sida iya mega udah bendar belatih belanda nyadi arapka ulih mih nembiak sekula kami ngetanka penuduk champion penuh baka taun nyin kemari,” ku iya.
Ungkup rikod, SMK Saratok ngempu gelar champion penuh MSSB dua taun bejurut iya nya taun 2020 enggau 2021.
Berebak enggau nya, Kaban Kunsil Nengeri (ADUN) Krian, Friday Belik bisi nyuaka bantu belanja sepenyampau RM3,500 ngagai kontinjen SMK Saratok dikena sida sepanjai pekit nya.-TVS
