BUKIT BEGUNAN, 7 Julai: Kaban Kunsil Nengeri (ADUN) Bukit Begunan, Datuk Mong Dagang madahka, Perintah Sarawak udah nyendiaka tanah pemesai dua hektar dikena ngemansangka Pasar Mit Lachau nyadi palan nginjin pemakai.
“Perintah udah merambu deka numbuhka palan nginjin pemakai ba Lachau.
“Tu udah dilanggur enggau udah dikemendarka, semina bedau temu projek tu dipejalaika.
“Tanah pan udah dibeli perintah. Tu siti chara dikena ngemansangka Lachau nyadi palan pengumpul buah enggau sayur,”ku iya.
Mong mansutka jaku nya rambau bejadika Program Simbolik Nyerahka Menira Sarawak ngagai bala tuai komuniti di Pasar Lachau ditu kemari.
Udah nya, iya nerangka pemisi projek nya jemah ila deka mantu nyungkak tikas sisioekomi perayat di sitak nya lebih agi raban ti ngemeranka pengawa bekebun enggau betanam.
Mong mega madahka lachau entara endur ti bisi penau nyadi alai ngumpul produk kebun sayur enggau buah baka rian, sibau, produk ti digaga perayat ke bisi dijual ba tamu.
Kelimpah ari nya, ku iya penembu jalai besai Pan Borneo ngemudahka rayat mai asil kebun ngambika ulih dijual seraya meri asil penatai pemisi ngagai sida.- TVS
