KUCHING, 2 Feb: Premier Sarawak, Datuk Patinggi Tan Sri Abang Johari Tun Openg madahka perintah nengeri deka neruska Bantuan Khas Sarawakku Sayang (BKSS) dikena mantu ngelempungka tating belanja rayat enggau komuniti pedagang ti napi pemar ekonomi pengudah pandemik COVID-19.
Iya madahka, bantu nya ngelanjarka diskaun bil elektrik lima nyentuk 25 peratus ke ngaul penguna domestik, komersial enggau industri dalam timpuh enam bulan keterubah taun tu.
“Inisiatif tu ngaul kos penyampau RM200 juta. Tuju perintah Sarawak bejalaika bantu tu dikena ngurangka kos pengidup enggau kos dagang ke ditapi rayat,” ku iya madah rambau aum media ke diatur ba Dewan Kunsil Nengeri (DUN) Sarawak lebuh Hari Empat.
Abang Johari nerangka pemutus neruska BKSS ungkup elektrik nya mandangka komitmen perintah Sarawak ke bebendar deka mulaika pemanah ekonomi awak ke rayat terus ngasaika pengelantang nengah pakej BKSS baka ti dipejalaika sebedau tu.
“Perintah Sarawak ba baruh Gabungan Parti Sarawak (GPS) deka seruran menatika pengelantang rayat nengah chara bejalaika pakej BKSS, lebih agi rayat ari ruang bilik kurang asil penatai pemisi,” tandu iya.
Tiga Sapit Premier, Datuk Amar Douglas Uggah Embas, Datuk Amar Awang Tengah Ali Hasan enggau Dato Sri Dr. Sim Kui Hian mega bisi ngulu aum media ke diatur nya.
Ba aum media nya, Abang Johari madahka Sarawak mujur bulih asil penatai pemisi sepenyampau RM11.9 billion ba taun 2022.
Ku iya madah, asil penatai pemisi nya ke pemadu tinggi kala dirikodka naka ke diatu. – TVS
